தேவனுடைய உறுதியான அஸ்திபாரம் (2 தீமோத்தேயு 2:19)

தேவனுக்கு மகிமை,

தேவனுடைய உறுதியான அஸ்திபாரம்

"கர்த்தருடைய உறுதியான அஸ்திபாரம் நிலைத்திருக்கிறது. கர்த்தர் தம்முடையவர்களை அறிவாரென்பதும், கர்த்தருடைய நாமத்தைச் சொல்லுகிற எவனும் அநியாயத்தைவிட்டு விலகக்கடவனென்பதும், அதற்கு முத்திரையாயிருக்கிறது." 2 தீமோத்தேயு 2:19

தேவனின் அஸ்திபாரம் உறுதியானது என்பதற்கான தெளிவான முத்திரை ஒன்று, கர்த்தர் தம்முடையவர்களை அறிவார் என்பதுதான். பல சந்தர்ப்பங்களில், இயேசு பலரையும் அறியவில்லை என்று சொல்லும்போது  (மத்தேயு 7:23, 25:12, லூக்கா 13:27) இயேசு நம்மை அறிவார் என்பது தேவனுக்கு முன்பாக நமக்குக் கிடைத்த பாக்கியமே ஆகும். இயேசு அனைவரையும் அல்ல, சில சிறப்பான அனுபவங்களைப் பெற்றவர்களையே அறிவார். எனவே, அந்த சிறப்பான அனுபவங்களைக் கொண்டவர்களாக மாற கர்த்தர்  நமக்கு மிகவும் உதவிசெய்வாராக. இந்த சிறப்பான குணங்களை ஒவ்வொன்றாகப் படிப்போம்.

முதலாவதாக கர்த்தர் தம்முடையவர்களை அறிவார் என்று நாம் படிக்கும்போது, (2 தீமோத்தேயு 2:19) தம்முடையவர்களை அறிவார் என்று இயேசுவும்  கூறுகிறார் (யோவான் 10:14). கர்த்தரால் மீட்கப்பட்டு தன்னுடையவர்களாகும்படி பெயர் சொல்லி  அழைக்கப்பட்டவர்கள்தான் கர்த்தருடையவர்கள் ஆவார்கள் (ஏசாயா 43:1). இந்த புதிய ஏற்பாட்டு காலத்தில், இயேசு கிறிஸ்து உலகத்தின் பாவத்தை நீக்கும் ஆட்டுக்குட்டியாக உலகத்திற்கு வந்தார் (யோவான்1:29). அந்த இயேசு கிறிஸ்துவாகிய ஆட்டுக்குட்டியின் குற்றமில்லாத மாசற்ற    விலையேறப்பெற்ற இரத்தத்தால் ஒரு கூட்டம் ஜனங்கள் மீட்கப்படுகிறார்கள் (1 பேதுரு 1:18-19). இவ்வாறு மீட்கப்பட்டு தங்களைப் பெயர் சொல்லி அழைத்தவரின் புண்ணியங்களை அறிவிக்கத் தெரிந்தெடுக்கப்பட்டவர்களாகிய சொந்த ஜனங்களே தேவனுடையவர்கள் ஆவார்கள் (1 பேதுரு2:9,10). நல்ல மேய்ப்பரான இயேசு, தாம் அறிந்திருக்கும் தம் ஆடுகளுக்காகத் தம் ஜீவனைகொடுக்கிறார் (யோவான் 10:14-15). இயேசுவை ஏற்றுக்கொண்டு, அவருடைய நாமத்தில் விசுவாசித்து, தேவனுடைய பிள்ளைகளாக மாறுகிறவர்கள்தான் இயேசு அறிந்திருக்கும் இயேசுவின் ஆடுகள் (யோவான் 1:12). மத்தேயு 1:21 ல் இயேசு தம் ஜனங்களை அவர்களுடைய பாவங்களிலிருந்து இரட்சிக்கிறார் என்று வாசிக்கிறோம். ஆகையால், இயேசுவின் சிலுவை மரணத்தினால் நாம் இரட்சிக்கப்பட்டு, பாவ மன்னிப்பையும்பெற்று, மீட்கப்பட்டதினால், நாம் இன்று தேவனுக்குரியவர்களாகவும் தம்முடைய சொந்த ஜனமாகவும் தேவனால் அறியப்பட்டவர்களாயிருக்கிறோம். எல்லா அநீதியும் பாவம் என்பதால், பாவ மன்னிப்பைப் பெற்று, கர்த்தருடையவர்களாகி கர்த்தருடைய  நாமத்தைத் தொழுதுகொண்டவர்கள் எல்லா அநீதியிலிருந்தும் விலக வேண்டும் (1 யோவான் 5:17). அதிக கேடானது ஒன்றும் உனக்கு வராதபடி இனி பாவம் செய்யாதே என்று இயேசு கூறுகிறார் (யோவான் 5:14, 8:11).

பின்னர், நாம் கர்த்தருக்கு சொந்தமானவர்கள் என்று விளங்கும்படிக்கு நாம் கர்த்தருக்குள் நிலைத்திருப்பவர்களாக இருக்க வேண்டும் (1 யோவான் 2:19). அதாவது கர்த்தர் தம்முடையவர்களை முடிவுபரியந்தம்  நேசிக்கிறார் (யோவான் 13:1). எனவே, நாம் இயேசுவின் அன்பிலும் நிலைத்திருக்க வேண்டும். இதற்காக, இயேசு பிதாவின் கற்பனைகளை கைக்கொண்டு, தேவனுடைய அன்பில் நிலைத்திருந்தது போல, இயேசுவின் கற்பனைகளைக் கைக்கொண்டால், நாம் இயேசுவின் அன்பில் நிலைத்திருக்க முடியும் (யோவான் 15:9-10). மேலும், எண்ணாகமம் 16:5 ல் கர்த்தர் தம்முடையவர்கள் யார், தம்மண்டையிலே சேரக்கூடிய பரிசுத்தமானவர்கள் யார், என்பதை வெளிப்படுத்தும்போது ​​அவர் தெரிந்து கொள்கிறவர்களை தம்மிடம் சேர்த்துக் கொள்வார் என்று அவர் கூறுகிறார். தெரிந்து கொள்கிறவனுடைய அடையாளமாக கர்த்தர் வெளிப்படுத்துவது துளிர்த்து, பூ பூத்து, கனி கொடுக்கும் அனுபவமாகும் (எண்ணாகமம் 17:5-8). நாம் கனி கொடுப்பதற்காக தெரிந்து கொள்ளப்பட்டவர்கள் (யோவான் 15:16). எனவே, நாம் கர்த்தருக்குள் நிலைத்திருந்து, மிகுந்த கனிகளைக் கொடுக்க வேண்டும் (யோவான் 15:4-5). மட்டுமல்ல அந்தக் கனி பரிசுத்தமாகுதலும் ஆக வேண்டும் (ரோமர் 6:22). அப்போது நாம் பரிசுத்தமாக்கப்பட்டு  கர்த்தரோடு கூட சேர்ந்து அவருடையவர்களாக அவரோடு கூட வசிக்க முடியும். இயேசு நமக்காக  நித்தியத்தில் ஆயத்தப்படுத்தும் இடத்திலும், அவரோடு கூட இருக்கவும் முடியும் (யோவான் 14:3).

இரண்டாவதாக யோவான் 10:26,27 ல் இயேசு தம்முடைய ஆடுகளை அறிந்திருக்கிறார், ஏனென்றால் அவர்கள் அவருடைய சத்தத்தைக் கேட்டு அவரைப் பின்பற்றுகிறார்கள். இயேசு தம்முடைய வார்த்தைகளைக் கேட்டு அவைகளின் படி  செய்யாதவர்களையும், இயேசு கட்டளையிடாத காரியங்களைச் செய்கிறவர்களாகிய அக்கிரமத்தைச் செய்கிறவர்களையும் நான் ஒருக்காலும் அறியவில்லை என்று கூறுகிறார் (மத்தேயு 7:21-27). முடிவுபரியந்தம்  கர்த்தருடைய கட்டளைகளை நிறைவேற்றுபவர்களே இயேசுவோடு அதிகாரத்தைப் பெற்றும் ஆட்சி செய்தும், அவரோடு கூட வாசம்பண்ணுகிறவர்களாயும் இருப்பார்கள் (வெளிப்படுத்துதல் 2:26). இயேசு தம்முடைய மகிமையின் சிங்காசனத்தில் அமர்ந்திருக்கும்போது, ​​இஸ்ரவேலின் பன்னிரண்டு கோத்திரங்களையும் நியாயந்தீர்த்து, பன்னிரண்டு சிங்காசனங்களில் அவருடன் அமர்ந்திருக்கும் அவருடைய அப்போஸ்தலர்களிடம் இந்த குணாதிசயங்களைக் காண்கிறோம் (மத்தேயு 19:28). சீஷர்களில் பலர் இயேசுவின் உபதேசம் கடினமானது என்று கூறி ஏற்றுக்கொள்ள முடியாமல் , பின்வாங்கிப் போனவர்களாய் அவரைப் பின்பற்றாமல் போனார்கள். ஆனால் பன்னிரண்டு பேரும் அவருடைய வார்த்தைகள் நித்திய ஜீவனின் வசனங்கள் என்று கூறி இயேசுவை விட்டு பின்வாங்கி போகாமல் முடிவு வரை அவரைப் பின்பற்றினார்கள் (யோவான் 6:60,66-68).இயேசுவின் வார்த்தைகளைக் கேட்டு அதின்படி செய்பவர்களே விழுந்து போகாமல்  நிலைத்திருப்பார்கள் (மத்தேயு 7:24-25). ஆகையால், நாம் கர்த்தருடைய வழியை விட்டு சாயாமல் அதை கைக்கொண்டு அவருடைய உதடுகளின் கற்பனைகளை விட்டு பின் வாங்காமலும் அவருடைய வாயின் வார்த்தைகளை நமக்கு வேண்டிய ஆகாரத்தை பார்க்கிலும் அதிகமாகப்  பாதுகாத்து ஜீவிக்கிறவர்களாகவும் இருக்க வேண்டும் (யோபு 23:10-12). நல்ல மேய்ப்பரான இயேசுவின் சத்தத்ததைக் கேட்டு, அவரது அடிச்சுவடுகளை தொடர்ந்து அவரைப் பின்பற்றிக்கொண்டு அவருடையவர்களாக மாற்றப்பட்டு, இயேசு நம்மை அறிகிற அனுபவம் நமக்கு உண்டாகக்கடவது.

மூன்றாவதாக கர்த்தர் நல்லவரும், இக்கட்டு நாளிலே அரணான கோட்டையும் ஆனபடியால், தம்மை நம்புகிறவர்களை அறிந்திருக்கிறார் (நாகூம் 1:7). கர்த்தர் நம்முடைய வாழ்க்கையில் எப்போதும் நமக்கு நல்லவர், நம்முடைய இக்கட்டுகளில் ஏற்ற துணையுமானவர். ஆனால் கர்த்தர் நல்லவர் என்பதை ருசித்துப்பார்ப்பதற்கு அவர்மேல் நம்பிக்கையாய்  இருக்கிற மனுஷன் தான் பாக்கியவான் (சங்கீதம் 34:8). நாம் உண்மையிலேயே கர்த்தரிலேயே  அடைக்கலம் புக வேண்டும், அல்லது கர்த்தரையே நம்ப வேண்டும். எரேமியா 17:5 ல் மனிதனை நம்பி, மாம்சத்தைத் தன் புயபலமாக்கி, தன் இருதயத்தை கர்த்தரிடமிருந்து விலக்குகிற மனிதன் சபிக்கப்பட்டவன் என்று சொல்லுகிறார். ஆனால் எரேமியா 17:7 ல் கர்த்தரை நம்பி, கர்த்தரையே தன் நம்பிக்கையாகக் கொண்ட மனுஷன் பாக்கியவான் என்று வாசிக்கிறோம். உறுதியான இருதயத்துடன் நாம் கர்த்தரை நம்ப வேண்டும் (ஏசாயா 26:3). இருமனமும், சந்தேகமும் உள்ளவர்கள் கர்த்தரிடத்திலிருந்து எதையும் பெற்றுக்கொள்ள  முடியாது, ஏனெனில் அவர்கள் நிலையற்றவர்கள் (யாக்கோபு 1:6-8). ஆனால் கர்த்தர் அறிகிறவர்களையும், அவருடைய கண்கள் கவனித்து கொண்டிருக்கிறதும் தம்மைப் பற்றி உத்தம இதயத்தோடிருக்கிற, கர்த்தரை நம்புகிறவர்களேயே ஆகும். அவர்களுக்காக கர்த்தர் தம்முடைய வல்லமையை  விளங்கபண்ணுகிறார் (2 நாளாகமம் 16:9). ஆகையால், உன்னதமானவருடைய மறைவிலிருந்தும் சர்வ வல்லவருடைய நிழலில் வசித்துக்கொண்டும்  நாம் அடைக்கலம் புகும் கர்த்தரைப் பற்றி எப்போதும், கர்த்தர் நமக்கு அடைக்கலம், கோட்டை, என் தேவன், நாம் நம்பி இருக்கிறவரும்  என்று கூறுவோமாக (சங்கீதம் 91:1-2).

நான்காவதாக  இயேசு தாம் தெரிந்தெடுத்தவர்களை அறிந்திருப்பதாகக் கூறுகிறார் (யோவான் 13:18). நாம் இயேசுவை தேர்ந்தெடுக்கவில்லை  இயேசுவே நம்மைத் தெரிந்தெடுத்தார் என்பதை நாம் புரிந்து கொள்ள வேண்டும் (யோவான் 15:16). அவருடைய இரக்கம் மிகவும் பெரியதாயிருப்பதினால் அவருடைய மிகுந்த கருணையும், இரக்கமுமே இந்த அற்புதமான அனுபவத்திற்கு கர்த்தரால் நாம் தெரிந்தெடுக்கப்பட்டதற்கு   காரணம். நம்முடைய கிரியைகளினால் அல்ல, விசுவாசத்தின் மூலம் கிருபையால் அவருடைய ஈவினால் நாம் இரட்சிக்கப்பட்டோம் (எபேசியர் 2:8-9). நாம் பைத்தியமானவர்களும், பலவீனமானவர்களும், இழிவானவர்களும், அற்பமாய் எண்ணப்பட்டவர்களும், இல்லாதவர்களுமாயிருந்தபோது, கர்த்தர் நம்மைத் தெரிந்தெடுத்தது நாம் அவருக்கு முன்பாக பெருமைப்படாதிருப்பதற்காகவே (1 கொரிந்தியர் 1:27-29). எனவே நம்முடைய தெரிந்து கொள்ளுதலை அறிந்து நாமும் அதற்கேற்றவாறு வாழ்வோமாக (1 தெசலோனிக்கேயர் 1:3). யோவான் 15:19 ல் நாம் உலகத்தாரல்லாமல் வாழ்வதற்காக, தேவன் நம்மை உலகத்திலிருந்து தெரிந்தெடுத்தார் என்று   இயேசு கூறுகிறார். இயேசு உலகத்தானல்லாதது போல, நாமும் உலகத்தாராக இருக்கக்கூடாது என்பதற்காகவே ஆகும் (யோவான் 17:14-16). எனவே, நாம் இந்த உலகத்துக்கேற்ற ஒத்த வேஷம் தரித்திராமல் ஜீவிக்க வேண்டும் (ரோமர் 12:2). தேவனுக்கு முன்பாக மாசில்லாத சுத்தமான பக்தி என்பது உலகத்தால் கறைப்படாமல் நம்மைக் காத்துக்கொள்வதாகும் (யாக்கோபு 1:27). எனவே, நாம் இந்த உலகில் வாழும்போது, ​​இச்சையினால் உலகத்திலுண்டான கேட்டுக்கு தப்பி வாழ்வோமாக (2 பேதுரு1:4).

மீண்டும் யோவான் 15:16 ல் இயேசு நம்மைத் தெரிந்தெடுத்தது நாம் கனி கொடுக்கும்படியாகவும், நம் கனி நிலைத்திருப்பதற்காகவும் என்று அவர் கூறுகிறார். கனி கொடுக்காதவர்களை கர்த்தரே நீக்குவார் என்பதே உண்மையாகும் (யோவான் 15:2). கர்த்தர் தம்முடைய சிருஷ்டிப்பில்  கனிதரும் விருட்சங்களை முளைப்பிக்கும் போது, ​​விதையுடன் கனி கொடுக்கும் மரங்களை சிருஷ்டித்தார் (ஆதியாகமம் 1:11-12). எனவே, நாம் கனி கொடுக்காத மரங்களாக இருக்கக்கூடாது (யூதா 1:12). தேவனுடைய வசனமாகிய  விதையையுடைய பழமரங்களாக, தேவனுடைய வார்த்தையின்படி கனி கொடுக்கும் மரங்களாக நாம் மாற வேண்டும். பயிரிடுகிறவராகிய நம் கர்த்தர்  பூமியின் நற்பலனுக்காகக் காத்திருக்கிறார் (யாக்கோபு 5:7). என்பதை அறிந்து  நாம் நம் ஆண்டவரில் நிலைத்திருப்பதால் மிகுந்த பலனளிக்க முடியும் (யோவான் 15:5). மேலும் நம் கனியும் நீடித்து நிலைத்திருக்க கூடியதாய் இருக்க வேண்டும். பழையவைகளும், புதியவைகளுமானதொன்றும் வீணாகாமல் சேகரித்து வைத்தவர்களாக எல்லா அருமையான கனிகளையும் உடையவர்களாய், அவற்றைச் சேகரிக்க வரும் நம் கர்த்தருக்கு முன்பாக நாம் நிற்போமாக (உன்னதப்பாட்டு 7:14). கர்த்தருடைய உறுதியான அஸ்திபாரமாகிய அவருடைய நித்திய நோக்கம் உறுதியாக நிற்கிறது கர்த்தர் தம்முடையவர்களைத் தெளிவாக அறிவார் (2 தீமோத்தேயு 2:19). ஆகையால், அவர் வரும் நாளில், கர்த்தர் தம்முடைய மகிமையின்  பிரசன்னத்தின் நாளில்  வெளிப்படும்போது, ​​அவர் தம்முடைய பொக்கிஷங்களைச் சேகரிக்க வரும்போது, ​நாம் அவருடைவர்களாக அவரிடத்தில் சேர்க்கப்படுவோம் (மல்கியா 3:17). நம் தேவனாகிய கர்த்தர் நம் அனைவருக்கும் இந்த அனுபவத்தை பெற்றுக் கொள்வதற்கு  உதவி செய்து நம்மை ஆசீர்வதிப்பாராக.